दिवाळी 

      भल्या पहाटे उदबत्तीच्या सुगंधानं जाग यावी, आईची अभ्यंग स्नानाची गडबड कानांबरोबर डोळ्यांनीही टिपावी,
पहाटेच्या चंद्रप्रकाशात अंगणात मांडलेल्या पणत्यांची माळ जमिनीवर सांडलेल्या चांदण्यापरी भासावी,
तिथेच शेजारी काढलेल्या सुंदर रेखीव रांगोळीने आणि त्यातल्या रंगांनी दिवाळीच्या त्या गोजिऱ्या सकाळची प्रसन्नता अजूनच वाढवावी…
नवीन कपड्यांचे ते कोरे वास, स्वतः तयार केलेले झुरमुळ्याचे आकाश कंदील-शुभेच्छापत्र, चिखलात बरबटून साकारलेले इटुकले रायगड-प्रतापगड,
'खुसखुशीत झाली कि नाही बघू गं' म्हणत करता करताच संपवलेले चकलीचे अर्धे अधिक घाणे आणि खूप प्रयत्न करूनही लक्ष्मीपूजनाला डोळे मिचकावत हसलेले अनारसे…
दरवर्षी येणारे दिवाळीचे हे इतके लोभस रूप… तेच…तसेच पण अगदी हवेहवेसे वाटणारे…


जगलेल्या क्षणांच्या आठवणी झाल्या कि त्या उगीच मौल्यवान भासू लागतात.
मग आपल्या लहानपणीची दिवाळी मनात सकारात तो आनंदाचा ठेवा पुढच्या पिढीनेही तसाच जपावा यासाठी आपल्याच नकळत सुरु होते एक लगबग, धावपळ.... जी असते यावर्षीच्या दिवाळीच्या स्वागताची जय्यत तयारी…

तुम्हा सर्वाना दिवाळीच्या मनापासून खूप शुभेच्छा.....Happy Diwali 2015 !



                                                                                     -- अश्विनी वैद्य